कोरोना भाइरसको संक्रमणबाट दक्षिण एसियाली क्षेत्रीय सहयोग सङ्गठन (सार्क) का सदस्य राष्ट्रहरुमा ३१ जनाको मृत्यु भएको छ ।
१५ दिनअघिसम्म कोरोना भाइरसको संक्रमण नै नदेखिएका सार्क मुलुकमा दुई सातायता ३१ जनाको मृत्यु भएको हो ।
मृत्यु हुनेमा सार्कका पनि भारत, पाकिस्तान, बंगलादेश र अफगानिस्तानका नागरिक छन् ।
दक्षिण एसियाली मुलुकहरुमा मृतकको संख्याका आधारमा सबै भन्दा बढी भारत प्रभावित भएको छ भने संक्रमितका आधारमा पाकिस्तानमा बढी असर देखिएको छ ।
भारतीय सञ्चारमाध्यहरुका अनुसार बिहिबार अपरान्ह १ बजेसम्म भारतमा कोरोना भाइरसका कारण १६ जनाको मृत्यु भएको छ । करिव ७ सय मानिसमा कोरोना भाइरसको संक्रमण देखिएको छ ।
संक्रमित भएकाहरु मध्ये ४३ जना निको भएका छन् । कोरोना भाइरसको संक्रमण ब्याप्त भएपछि भारतले मंगलबार मध्यराति देखि २१ दिनको लकडाउन घोषणा गरेको छ ।
भारतपछि सबैभन्दा बढी पाकिस्तानमा ८ जनाको मृत्यु भएको छ । पाकिस्तानमा संक्रमित हुनेको संख्या भने सार्क राष्ट्रकै सबैभन्दा बढी छ ।
त्यहाँ ११ सय २ जना कोरोना भाइरसबाट संक्रमित भएका छन् । त्यसमध्ये छ जना सिकिस्त अवस्थामा रहेकाले मृतकको संख्या बढ्न सक्ने पाकिस्तानी स्वास्थ्य अधिकारीहरुले जनाएका छन् ।
पाकिस्तानमा कोरोना संक्रमितहरुको संख्या पनि दिनदिनै बढ्दै गएको छ । पाकिस्तानमा बिहिबार थप ३९ जनामा कोरोनाको संक्रमण देखिएको छ । कोरोनाको संक्रमण बढ्दै गएपछि पाकिस्तानले आन्तरिक हवाई उडान समेत बन्द गरिसकेको छ ।
कोरोना भाइरसका कारण सार्क सदस्य राष्ट्रहरुमा सबैभन्दा बढी प्रभाव पार्ने मूलुकको तेस्रो नम्बर सूचिमा बंगलादेश छ ।
बंगलादेशमा बिहिबार अपरान्हसम्म ५ जनाको मृत्यु भएको छ । ३९ जनामा संक्रमण देखिएको छ ।
यस्तै अफगानिस्तानमा कोरोना भाइरसको संक्रमणबाट २ जनाको मृत्यु भएको छ भने ८४ जना संक्रमित देखिएका छन् ।
अहिलेसम्म कोरोना भाइरसबाट सार्क मुलुकमा श्रीलंकामा ज्यान गुमाउनेको संख्या शुन्य नै रहे पनि संक्रमितको संख्या भने १ सय २ पुगेको छ ।
तीन जना निको भएर घर फर्किए पनि २ जनाको अवस्था गम्भीर रहेको अन्तर्राष्ट्रिय सञ्चार माध्यहरुले जनाएका छन् ।
यस्तै माल्दिभ्समा १३ जनाको संक्रमण देखिएको छ भने नेपालमा ३ जनामा कोरोना भाइरसको संक्रमण देखिएको छ । एक जना निको भएर २ महिना अघि नै घर फर्किए पनि दुई जनाको उपचार जारी छ ।
सार्क राष्ट्रमा सबैभन्दा कम असर परेको मुलुकमा भुटान छ । त्यहाँ कोरोना भाइरसबाट अहिलेसम्म २ जना मात्र संक्रमित भएका छन् ।