कोरोनाको उपचारपछि निको भएर घर फर्किएका रौतहटका एक युवकलाई एक सातापछि फेरि अस्पताल भर्ना गरिएको छ ।
रौतहट, इशनाथ नगरपालिकाका १९ वर्षीय ती युवकको रिपोर्ट शंकास्पद देखिएको भन्दै बीरगञ्जस्थित नारायणी अस्पतालको आइसोलेसन वार्डमा भर्ना गरिएको हो ।
कोभिड–१९ संक्रमण पुष्टि भएपछि उनलाई बैशाख २ गते नारायणी अस्पताल भर्ना गरिएको थियो ।
आइशोलेनशमा १२ दिनसम्म राखिएका उनको पीसीआर परीक्षणको तेश्रो ,चौथो र पाचौँ रिपोर्ट नेगेटिभ आएपछि बैशाख १४ गते डिस्जार्च भएका थिए ।
नारायणी अस्पतालका प्रमुख मेडिकल सुपरिटेन्डेन्ट डा.मदनकुमार उपाध्यायले उनमा थप परीक्षण गर्नुपरेकाले अस्पताल भर्ना गरिएको बताए ।
बुधबार अस्पतालबाट गएको टोलीले ती युवकको स्वास्थ्य जाँच गर्नुको साथै रगत र थ्रोट स्वाबको नमुना संकलन गरेर ल्याएको थियो ।
त्यसको रिपोर्ट शंकास्पद देखिएको जनाइएको छ । बैशाख १४ मा उनीसंगै भारतका तीन जना जमातीको रिपोर्ट नेगेटिभ आएपछि उनीहरुलाई पनि अस्पतालबाट डिस्चार्ज गरिएको थियो ।
यो पनि पढ्नुहोस
प्रहरीले काठमाडौं उपत्यकाका विभिन्न स्थानबाट लकडाउन उल्लंघन गर्ने ७ सय ८४ जनालाई पक्राउ गरेको छ ।
अत्यावश्यक बाहेक घर बाहिर ननिस्किन प्रहरीले आग्रह गर्दा गर्दै पनि अटेरी गर्ने ७८४ जनालाई पक्राउ गरिएको प्रहरीले जनाएको हो ।
जसमध्ये लकडाउन उल्लघंन गर्दै सडकमा निस्कने १ सय ९६ जना महिला समेत रहेका छन्।
उनीहरुलाई तीन घण्टासम्म सडकमा राखेर घर फर्काउने गरेको छ। काठमाडौंकै केही ठाउँमा लकडाउन उल्लंघन गर्नेलाई सडकमा नै खादा लगाइदिने समेत गरिएको छ ।
यसैबीच हिजो शनिबार मात्रै सवारीसाधनको पासमा आफैँले मिति सच्याउँदै सवारी चलाउने, पासको दुरुपयोग गरेका कारण दर्जनौँ कारबाहीमा परेका छन् ।
आइतवार बिहान ८ बजेसम्म प्रहरीले २ सय ४ वटा सवारी साधनलाई नियन्त्रणमा लिइएको प्रहरीले जनाएको छ ।
कोरोना भाइरसको संक्रमण रोक्न सरकारले गत चैत ११ गतेबाट लकडाउन घोषणा गरेको हो। पछिल्लो पटक थपिएको लकडाउनको समय वैशाख २५ गते सकिँदैछ। लकडाउनको आज ४१ औं दिन पुगेको छ ।
यसैबीच हालसम्म नेपालमा ५९ जना कोरोना संक्रमित भेटिएका छन् । ती मध्ये १६ जना निको भएर घर फर्केका छन् भने बाँकीको विभिन्न अस्पतालमा उपचार भइरहेको छ ।