काठमाडौं– नेपालमा कोरोना संक्रमितको संख्या ९ पुगेको छ । स्वास्थ्य तथा जनसंख्या मन्त्रालयकाअनुसार ३ जना नयाँ व्यक्तिमा संक्रमण देखिएसँगै संक्रमितको संख्या ९ पुगेको हो ।
स्वास्थ्य तथा जनसंख्या मन्त्रालयले मुम्बईबाट फर्किएका कैलालीका २१ वर्षीय युवक, भारतको उत्तराखण्डबाट कञ्चनपुर फर्किएका ४१ वर्षीय पुरुष र यसअघि कैलालीमा कोरोना संक्रमण देखिएका ३४ वर्षीय पुरुषका आफन्त ३४ वर्षीया महिलामा कोरोना संक्रमण देखिएको जनाएको छ ।
नेपालमा चौथो संक्रमितको रुपमा कोरोना पोजेटिभ देखिएका कैलालीको धनगढीका युवाकी भाउजुमा कोरोना संक्रमण देखिएको हो ।
यूएईको दुबईबाट नेपाल आएका ३५ वर्षीय युवक चैत ११ गते सेती प्रादेशिक अस्पताल धनगढीमा भर्ना भएका थिए । स्वाव संकलन गरी परीक्षण गर्ने क्रममा उनमा कोरोना पोजेटिभ देखिएको थियो ।
उनमा कोरोना पोजेटिभ देखिएसँगै स्थानीय प्रशासनले उनको परिवारका सदस्यहरुलाई समेत आइसोलेसनमा भर्ना गरेको थियो । परिवारका सदस्यहरु सबैको स्वाव संकलन गरी परीक्षण गर्ने क्रममा उनकी भाउजु नाता पर्ने ३४ वर्षीया महिलामा पोजेटिभ देखिएको हो ।
यस्तै, भारतबाट आएका २ अन्य युवामा पनि कोरोनाको संक्रमण देखिएको छ । कोरोना संक्रमण देखिएकामध्ये कञ्चनपुरका ४१ वर्षीय पुरुष भने लुकेर सीमा नाकाबाट भित्र छिरेका थिए । भारतको उत्तराखण्डबाट नेपाल भित्रिएका उनी उच्च ज्वरो आए पछि अस्पतालको सम्पर्कमा आएका थिए । अस्पतालले स्वाव संकलन गरी परीक्षणका लागि पठाएको थियो । परीक्षणका क्रममा उनमा कोरोना संक्रमण पोजेटिभ देखिएको हो । उनीसँगै अन्य करिब ४ जना पनि लुकिछिपी सीमाबाट नेपाल प्रवेश गरेका जनाइएको छ ।
जिल्ला प्रशासन कार्यालय कञ्चनपुरले उनीहरुको खोजी भइरहेको जानकारी दिएको छ ।
नयाँ ३ जनासँगै नेपालमा हालसम्म कोरोना संक्रमितको संख्या ९ पुगेको छ । जसमध्येका १ जना उपचारपछि निको भएर घर गइसकेका छन् ।